Maonesho ya Wiki ya Huduma za Fedha Kitaifa Kwa mwaka 2024 yanafanyika Mkoani Mbeya wilaya ya Mbeya mjini katika kiwanja cha Ruandanzovye yenye Kauli Mbiu "Elimu ya Fedha, Msingi wa Maendeleo ya Kiuchumi".

Leo tarehe 23 Oktoba, 2024 Maonesho hayo yamefunguliwa rasmi na Waziri wa Elimu, Sayansi na Teknolojia Mhe. Prof. Adolf Mkenda.

Mhe. Prof. Mkenda amesema Maonesho hayo yataongeza uelewa kwa wananchi kujua shughuli mbalimbali zinazofanywa na Serikali pamoja na wadau mbalimbali walioshiriki katika Maonesho hayo.

Aidha, Mhe. Prof. Mkenda amesisitiza nukuu ya Mhe. Kassim Majaliwa Waziri Mkuu wa Jamhuri ya Muungano wa Tanzania wakati wa Maadhimisho ya Wiki ya Huduma za Fedha Kitaifa mwaka 2023 Mkoani Arusha alisema "Kuendelea kutekeleza Programu ya Elimu ya Fedha na kuhamasisha utumiaji wa huduma rasmi za Fedha hususani vijijini, Elimu zaidi kutolewa katika maeneo ya usimamizi wa Fedha binafsi, mikopo, akiba, hisa, bima na kujianda na maisha ya kustaafu na kukamilisha mfumo wa kuwalinda watumiaji wa huduma za Fedha"

Awali Mhe. Mkenda alipowasili ametembelea mabanda mbalimbali ili kujionea namna Taasisi na wadau wanavyotoa Elimu kwa wananchi ambapo alipita kwenye Taasisi za NSSF na PSSSF zilipo chini ya Ofisi ya Waziri Mkuu Kazi, Vijana, Ajira na Wenye Ulemavu ambapo amezipongeza kwa namna zinavyotoa huduma kwa ufanisi.